Á Kristnesi var reist berklahæli árið 1927 en þá geysuðu berklar, lífshættulegur smitsjúkdómur og lagðist hann sér i lagi á ungt fólk sem var þá tekið úr umferð og einangrað á berklahælum. Engin lyf voru til við berklum og komu ekki á markað fyrr en um miðja öldina. Eina læknisráðið var að veita sjúklingum gott húsaskjól, næringarríkan mat og frískt loft. Dánartíðni var há og fólk sem lagðist á hælin átti ekki endilega von á því að útskrifast þaðan aftur. Á HÆLINU segjum við sögur af missi, sorg, einangrun og örvæntingu en ekki síður von, æðruleysi, lífsþorsta og rómantík.